竞彩篮球:2019乐透秀简略

话咁快今年NBA季后赛已经进行到最白热化阶段,2018-19赛季距离结束时间所剩无几。咁喺总决赛正式开波之前,大家如果觉得猛龙同勇士嘅各方面话题听到有啲厌,不妨转下口味展望休赛期。而按时间嚟计算,距离我哋最近嘅一件盛事莫过于选秀大会,本文笔者将为大家浅析部分热门乐透新秀。

嚟自各大媒体同门户嘅推测,如无意外施安威廉臣会由鹈鹕用状元签囊括,呢位仁兄身体素质几咁恐怖相信好多人已经有过见闻,未满19周岁嘅佢身高6尺7寸,同时拥有超越极大多数NBA球员嘅吨位,力量、弹跳、速度等各方面完美结合令佢成为前所未见嘅“异形物种”。若然将投篮方面嘅短板全面升级,几年内好有机会成为联盟招牌。尽避下一站基本定咗,不过前程似乎不算明朗,外界不少人对佢有所保留在于呢副离晒谱嘅躯体,有乜“冬瓜豆腐”肯定手尾长;另外,由于安东尼戴维斯嘅前景难以预测,施安威廉臣肯定会有所牵连,到底系被重点培养抑或是辅助“一眉哥”,始终要等自由球员市场开启先可以进一步预测。更何况队中本身喺同位置就有一个“成品”(兰杜),话不埋高层会攞施安威廉臣去换其他一啲能够挽留安东尼戴维斯芳心嘅人返嚟。

拥有第二顺位选择权嘅灰熊近几个赛季目送一个个功勋各奔东西,如今随着康利年纪渐增,进入咗重建嘅佢哋系时候揾个天才控卫更新换代,届时便放飞康利去追逐梦寐以求嘅冠军荣耀。而嚟自梅利州立嘅摩兰特当属最佳人选,如果睇过录像、听过外界嘅评价,佢畀到大家最大印象就系一个字——“爆”。同康利完全不同嘅风格,摩兰特堪称近年嚟天赋最强嘅控卫,虽然身材不算出众,但大学时期场均攞到24.5分、5.7个篮板、10次助攻外加1.8个抢断,经常为观众贡献难度极高嘅暴力扣篮或者跳到头过篮框嘅无情盖帽,话佢似沃尔又好、威斯布鲁克又好,总之嚟紧我哋期待佢成日喺每日集锦度出镜。

本届咁多位后生仔,名气最大无疑系上述嘅施安威廉臣,不过成名最早其实另有其人,就系佢嘅公爵队友R.J.巴列特。之所以话R.J.巴列特出名得早,皆因佢喺2017年就带领加拿大青年队夺得U19男篮世界杯冠军,同时佢仲当选赛会嘅MVP,因此喺入大学之前也力压施安威廉臣被誉为全美第一高中生。同样拥有6尺7寸嘅身高,R.J.巴列特身材十分健硕,个人球风强横、侵略性十足,爆发力同脚步技巧融合得较为纯熟;其短板在于外围投篮水准欠奉、缺乏自信,稳定性不足。综合嚟睇,呢个也都系尼克斯未必百分百用探花签拣佢嘅原因,不排除会留畀湖人(第四)或者骑士(第五)。

前三顺位之外,今年帮助维珍尼亚夺得NCAA总冠军嘅锋线悍将德安德烈亨特都系一大热门新秀。身体强壮、出色嘅无球能力、定点三分值得信赖、切入同分波意识良好、外围防守可靠,被贴上呢类标签嘅球员适合潮流当今每支球队;但爆发力平庸、控球水准一般、得分手段有待开发,而且年底就满22周岁,预计上限不高。总体嚟讲,德安德烈亨特适宜喺已经定好咗核心嘅重建球队饰演绿叶。

嚟自传统名校北卡罗莱纳嘅“爆炸头”哥比怀特系本届控卫其中嘅另一佼佼者,身高6尺5寸兼具出色嘅速度同爆发力,横移步以及启动速度非常敏捷。最紧要系其个人进攻极具侵略性,同时又系无私嘅传球手,抢断功夫也令人称道。但缺点都比较难以掩盖,臂展长度平庸、投篮稳定性欠奉、身材偏瘦。综述,哥比怀特球风华丽、可塑性强,但需要大家给予足够耐心。

既然用“爆”描述摩兰特比较合适,咁过去一季NCAA效力于范德堡嘅矮仔加兰特最大卖点就系“快”。喺同届新秀里面,加兰特应该系控球同投篮两方面结合得最好嘅一位,单对单风格炫丽,变幻莫测嘅节奏令防守者倍感头痕;不过短板都好明显,身材矮防守端容易成为漏洞,大学时期失误偏多,最不利嘅系有过严重膝伤,呢啲也都系影响佢最终顺位嘅重要因素。

身为“公爵三少”之一,列迪殊成个大一生涯表现显然不及两位队友,因此外界都预测佢会跌出前五顺位,甚至可能十名以外。与施安威廉臣以及R.J.巴列特相比,虽然列迪殊运动能力无咁突出,但其投篮以及进攻技巧会喺前两者之上,厚实嘅上肢睇卖力量充分,应该可以好快适应NBA嘅对抗强度。

本届热门新秀控卫同侧翼前锋数量偏多,此前效力于德州嘅积臣夏耶斯算系难得见到潜力高佬,不单止身高臂长,或者因为爸爸曾经系职业橄榄球运动员,遗传咗出色嘅敏捷性同机动性。大一赛季,积臣夏耶斯投篮命中率高达72.8%,另外有统计佢喺近距离攻击篮框嘅命中率甚至去到恐怖嘅86.7%,咁出色嘅篮底终结能力当然适合任何球队。缺点方面,积臣夏耶斯容易陷入犯规困扰,身材不够出色因此篮板能力偏差,未来必须锻炼力量同韧性。

最后想提嘅系相对特别嘅一位——八村垒,呢位日本混血儿喺过去呢季NCAA令人留低深刻印象,身高6尺8寸、臂展达到7尺1寸,喺宜家呢个盛行高速攻防转换嘅年代最适合打三、四号位(小前锋、大前锋),甚至必要时推上五号位(中锋),于特雷蒙格连。虽然身材条件不错,但八村垒爆发力、弹跳力以及灵活度喺联盟其中仅属中等,想扮演挡拆后嘅篮底终结者比较困难。另外八村垒已经21岁,大学打咗3年先参加选秀,相比之下净系大过佢几个月嘅湖人前锋恩格林即将进入生涯第四个赛季。作为日本篮球未来带领人物,八村垒嘅上限的确不会太高。

Author: admin

发表回复

您的电子邮箱地址不会被公开。